《跑馬地→灣仔》
曾經好矚目嘅鄧家爭產事件已經歸向平淡，本來水火不相容嘅祥嫂洪金梅同一班子女，近幾年已經冰釋前嫌，經常見面食飯變番一家人。上星期五10點幾喺跑馬地，就見到兆尊、小艾同媽咪祥嫂喺一間雲吞麪店行出嚟，好明顯食完飯，兆尊仲拖住媽咪隻手扶住佢行，可以用母慈子孝嚟形容，其實一家人邊有隔夜仇。
「星仔係有玩人」
小艾上咗自己架寶馬，媽咪就坐司機位隔籬，兆尊坐後排，兩母女一上車二話不說就點起支飯後煙，唔食煙嘅兆尊惟有好無奈等個妹同媽咪食完煙開車，架車之後就駛咗去灣仔永祥大廈兆尊住嘅地方，樓下一早有兩名外籍傭工喺度等緊。兆尊落咗車媽咪祥嫂仲專登挍低車窗不停叮囑個仔，兆尊好乖咁企喺度不停點頭，講咗成分鐘祥嫂至肯走。
另外，早前梁思浩爆料話拍周星馳嘅電影《國產零零漆》時被玩，喊足17次，拍咗成晚只係roll咗一次機，同場有份拍嗰個槍斃鏡頭嘅兆尊接受電話訪問時就話：「NG咗6次啫，冇17次咁多，佢次次都有roll機。星仔係有玩人同鍾意玩，不過喺玩嘅過程你係學到嘢㗎，如果佢再搵我拍戲都一定會再去幫手。」不過兆尊係新馬仔個仔待遇可能唔同，梁思浩呢啲冇人冇物，應該會有「專人」招呼佢都唔定。
採訪、攝影：陳辰、黃曉程