【本報訊】歷史埋下的心結，保釣成員人人有一個，啟豐二號出航，正正是為了紓解鬱結。啟豐二號最快周四再出發，已經報名參與行動的成員超出上限8人，包括阿牛曾健成的兒子，每個人都希望可以被抽中，乘風破浪找尋失落的國土，「我哋係要不斷arouse（喚起）巿民，keep（保持）住令到中國人繼續知道呢件事，直至到光復」。
最終名單待抽籤決定
面對海事處的阻撓，保釣行動繼續氣勢如虹，報名極為踴躍，上次登島的成員全部要讓路，最終名單要抽籤決定，曾健成的弟弟曾海豐，過去曾多次出發保釣，今次再次報名，「我梗係希望可以衝到出去，不過上次俾我哋上到（釣魚台），搞到咁大件事，我估佢（日本人）今次到50海浬一定會撞低我哋」。
曾海豐透露，原來上月登島一直有「Plan B」（後備方案），一旦阿牛的隊伍失敗，他就會聯同其他保釣成員再出發，「傷亡乜都無所謂，次次出去都有簽生死狀，上到島就算坐監都開心，呢啲到時就係國家嘅事，唔需要我哋去理，總之我哋國民就係有權去我哋自己嘅地方」。他不諱言剛病癒出院的太太擔心他的安全，「唔擔心就假，不過始終咁大個人，每個人都有每個人嘅諗法」。
在保釣隊伍中屬於少壯派的王國豪亦有報名，他今年39歲，但已經有16年保釣年資，「去過幾次，上次攞假攞遲咗一日之嘛，如果唔係都出咗，不過來日方長」。他認為行動的價值，不在登島，「做呢個行動，唔係用成功同失敗去睇，我哋係要不斷arouse（喚起）巿民，keep（保持）住令到中國人繼續知道呢件事，直至到光復，我哋用國民嘅身份做多啲行動，對第日做國際仲裁都有幫助」。
「唔係要挑起戰爭」
對於被指摘保釣是挑釁行為，王國豪不同意，「我哋手無寸鐵，係佢哋拉我哋，我哋只係用好和平嘅方式去話畀人聽，去揭露問題，人民係國家嘅主人，有外敵入侵無理由唔出聲，個管家（中央政府）做唔做係另一回事，我哋唔係要挑起戰爭」。他和其他成員一樣，絕不怕死，「去得都預咗死，死都唔怕，仲有乜好驚？為正義而受逼迫應該開心」。