那邊廂就話樓價貴，這邊廂口齒伶俐、佗住孖女、大大個肚嘅陳慧琪，喺恒生頒獎禮客串司儀後，就猛嗌生女貴過生仔；家佢最希望滑浪風帆繼續成為奧運項目，等佢生完後可以繼續做運動員，賺多啲錢買衫畀B女。
生產期喺明年1月底嘅慧琪，雖然佗B至今重咗超過10公斤（現重70公斤），但着住平底鞋嘅佢做起司儀時十分醒神，佢話：「近排已買咗好多B女衫，每次shopping，都發覺B女衫靚過B仔衫好多，點買都買唔完。」噚日做完司儀，就立刻返去火炭體院做運動，原來呢位風帆代表，諗住生完後就要重新投入訓練，所以大住個肚都要保持基本訓練，家就靠游水及做「皮拉提」keep住先。
最近大家都擔心滑浪風帆被剔出下一屆奧運，慧琪就好樂觀咁話：「現在反對聲音都幾大，我覺得唔係冇機會番轉頭。」今年11月初，國際帆聯將喺愛爾蘭周年大會決定風帆命運。