咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【牛腩篇】最近一間負責收舊樓重建嘅公司，推出一個廣告，講一對兩小無猜嘅情人長大嘅經歷；其中呢間公司一向大公無私，奉公守法，屎便當、放蛇、剪電線、同最近掛鬼相，都一定唔關佢哋事，其實佢哋又毋須使錢拍廣告提升公司形象。原本廣告都冇咩問題，仲幾溫馨㖭，不過最後推出嘅標語「沒有舊、那有新」就真係有啲唔妥。「沒有舊、那有新」，睇喺上嚟好合理，但比「有雞先定有蛋先」仲玄妙；就好似沒有老、那有幼一樣，老人家可以點樣變後生？無錯，就係過身之後投胎下一世，就正如一層樓點樣由舊變成新？就係拆咗佢起過棟新，所以故宮、長城、凱旋門等歷史建築都不合時宜，應該拆咗佢起過新故宮、新長城、新凱旋門。舊嘢係唔係一定冇用？曼聯領隊費格遜就一定答你唔係；上周六37歲嘅史高斯幫曼聯踢第700場比賽，先開紀錄助紅魔鬼大勝韋根4:0；以史高斯球員生涯，贏過晒英超、歐聯、英足盃等主要錦標，亦都喺2011年退休過；不過上季中曼聯用人之際，費Sir請求佢復出，史高斯二話不說就應承，佢嘅忠心絕對值得一讚。小弟一向對曼聯冇咩好感，不過史高斯係少數小弟欣賞嘅曼聯球員，佢嘅頭腦、靈活同機動性，都係英格蘭球員少見。更難得係佢一向低調，唔似得好多未成名就自以為是嘅所謂英格蘭新星。文：牽牛