美國推出QE3，睇嚟香港樓價都會繼續升，想買樓嘅市民個個都牙痛咁聲，估唔到連「香港女車神」李慧詩（Sarah）都話樓價貴到離晒譜。呢位倫奧銅牌得主噚日領取贊助商嘅75萬元獎金，仍然話自己唔夠「彈藥」，冇乜能力上車。不過佢同時都收到個好消息，一手栽培佢嘅港隊總教練沈金康暗示擱置退休計劃，Sarah聽到後笑晒，話放下心頭大石！
「樓市升得太誇張」
啱啱喺山西太原全國賽攞到2銀1銅嘅Sarah，原定星期日晚返到香港，點知航班機件故障，等到噚日朝先上到飛機，抵達深圳後，再坐專車到中環恒生銀行總行攞大支票。
25歲嘅Sarah風塵僕僕，但仍然好風趣，話有排都未可以「升呢」躋身百萬富翁行列。喺牛頭角下邨長大嘅佢，同好多「80後」一樣都希望做業主，不過香港樓市升唔停，佢都話好難入市，「我想同屋企人住得舒服啲，環境一定要夠靜，不過香港樓市升得太誇張啦，所以要再儲下錢先。」
置業仲要等吓先，不過比賽又再殺到埋身，佢今晚又要返上廣州，準備下月中嘅場地單車世界盃哥倫比亞站。Sarah上月贏得倫奧女子凱林賽銅牌後，有報道指港隊總教練沈金康計劃榮休，但佢噚日暗示會留隊，「希望帶領運動員發揮出最高水平，踏上最高領獎台。Sarah正為里約熱內盧奧運備戰，希望透過科研數據，找出新突破。」
傳沈教練留隊慧詩開心
言下之意，即係沈教練都想親眼見到愛徒再進步，贏得大賽冠軍。Sarah聽到佢咁講，即時開心晒，「我好想佢繼續教，一齊再戰奧運，家真係放下心頭大石囉！」沈教練對港隊瞭如指掌，佢留低嘅話，對全隊都係好事。至於乒乓球隊嘅唐鵬同帖雅娜兩公婆，夾埋亦攞咗近17萬，亦都會將獎金儲起買樓，希望對香港更有歸屬感。
