喧傳已久嘅QE3又來了，九月十四日香港時間凌晨過後，美國聯儲局宣佈重大消息，（一）每月買入400億美元MBS，（二）買入時間無限期，（三）買入總金額無上限，（四）聯儲局利率維持在接近零，直至2015年中為止。
消息一出，本來在低位徘徊嘅杜瓊斯指數立即在紐約午飯時間急升，當日收市報13,539點，升咗206點，創2007年以來新高，九月十五日就係雷曼破產四周年，家唔記得晒咯，金融海嘯對金融市場之衝擊，已成為歷史。伯南克今勻推行第三輪量化寬鬆（QE3），實情等於每月注資400億美元入美國金融市場，所有大基金，銀行，散戶（當然係少數人）持有按揭債券（Mortgage-Backed Securities簡稱MBS）者，皆可在市場出售，有聯儲局揸住條吸水喉吸入，價格肯定有支持，聯儲局買入MBS，放出現金，銀行可以降低「有風險資產」嘅數量，即係話「風險資本充足比率」方面可以提高，有能力借多啲錢出街俾大中小企業，信貸額多咗，企業理論上可以多請工人，有助降低美國失業率。伯南克話買入MBS買到就業率有大幅度改善為止，故此買按揭債券會係長期動作。
如果QE有如此效力嘅，前兩輪QE一共用咗二萬三千億美元，點解美國失業率仍然高企在8%以上？點解仲有超過一千二百萬人失業？伯南克雖然係著名經濟專家，都無法解釋到過去兩輪唔掂，而三輪會掂。奧巴馬政府最多只係話如果冇QE，美國失業率不止8%咁高，情況會仲曳咁話。冇錯，銀行有更多頭寸，但唔敢借出去，廠商亦怕盲目擴充，唔敢借錢及請工人，故此實際上，伯南克派錢，只會刺激財務資產升值，股票大升，長時間維持極低利率，定會推高黃金價，貶低美元。以香港情形嚟講，因有聯繫匯率，香港不能單方面加息，按揭利率在未來三年仍會在極低水平，儲蓄存款給通脹蠶食，樓價想唔升都幾難。對梁振英政府來講，認真頭痛：（一）如何降低樓價以平民怨？陳德霖在9月14日宣佈之收緊措施，效用難敵低利率！（二）樓股上揚，富者愈富，堅尼系數必然持續上升，啲社工／社運人士點會放過政府？