山度士有尼馬（左）同冇尼馬，果然係兩隊波嚟。周日巴甲聯賽山度士作客出戰哥列迪巴，喺半場落後下，最終靠尼馬梅開二度以2:1反勝全取3分。自從尼馬踢完巴西國家隊歸隊之後，山度士近兩場聯賽全勝。呢位20歲射手，喺今場波其中一個入球直頭係個人表演，由禁區頂接應開始，以極速推過兩個後衞殺入禁區；再過埋另外兩個守將後，再扣埋門將搞掂，射入「世界波」。
