咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【咖喱篇】今日講吓西甲，因為嗰邊有隊皇家馬德里出閘脫腳，開季成績拍得住利物浦。我都好奇怪，皇馬人腳變動唔大，牌面超晒班，究竟佢哋衰咩？睇番佢哋嘅比賽同數據，搵到少少線索同大家分享。皇馬聯賽開季1勝1和2負，失4個波，其中3球都係死球。上場對西維爾，人哋斬角球去個空位度，皇馬球員掛住mark人，冇人清波，結果俾禁區外嘅杜查奧斯基衝入嚟射入。首場對華倫西亞同第2場對基達菲，皇馬同樣俾人接應罰球頂入，睇得出佢哋防守死球有好大問題。我同意名宿布達堅奴嘅講法，係球員嘅態度出咗問題。首先我唔信戰術大師摩連奴冇一套防守死球嘅策略，我認為只係執行上出咗問題，即係球員嘅專注力唔夠。參考網民嘅意見，皇馬上季聯賽成績太好，自以為除巴塞外再無敵手，再加上西超盃仲贏埋巴塞捧盃，一切都太順利，令皇馬球員輕敵。如果要揀球員嚟鬧，奧斯爾同迪馬利亞兩位中場發電機嘅表現大為退步。奧斯爾係上季嘅助攻王，聯賽交出17次助攻，但今季仲未有助攻；喺威脅傳球上，佢上季場均3次，而今季得1.5次。而迪馬利亞上季15次助攻，今季都仲食緊白果，作為翼鋒，佢喺4場聯賽11次傳中，但竟然冇次成功。我睇到嘅，相信摩連奴都睇到，皇馬今日就對曼城，睇吓摩帥到時有咩計仔啦。文：咖喱