狼班子上台後醜聞未停過，狼振英為咗逃避記者問長問短，不停出鱔稿、鱔片應酬傳媒，最近仲變本加厲，落區做騷都飛起埋官媒，直接搵禮義廉做代言人。
話說上星期六，上水站爆發網民同水貨客大戰，翌日民建聯北區區議員劉國勳，就喺自己facebook大晒佢同狼振英鬼祟喺上水站視察水貨客嘅做騷硬照，食正全城熱話高調抽水。
狼振英做事唔跟程序
八方同行家見到幅相，梗係即時打去政府新聞處，問吓狼振英落區詳情，點知政府新聞處最初竟然話「絕無此事」，激到成班行家紮紮跳。有行家大鬧，狼班子係咪講大話成癮，有圖有真相咁都仲要呃人？最後官媒先至以一句狼振英嗰日冇官方活動嚟遮醜。
八方聽聞，原來狼振英星期日約咗成班北區建制派中人食飯，席間講開北區嘅水貨客問題，有人口痕叫狼振英落現場睇，點知佢一口應承。由於即興，狼振英都冇通知手下，結果搞到特首辦同政府新聞處爆。
有官場中人話，狼振英上台後做乜都唔跟程序，乜嘢都搵自己友幫手，估唔到連落區都直接搵禮義廉做代言人，官媒又點？一樣冇碇企。睇怕以後，狼振英肯定會加強同禮義廉拍住上。
mailto:[email protected]