上季意甲開季後總共出現咗17次易帥，到今季大家都預咗好快會有第一個犧牲品，結果由巴勒莫大熱跑出，教練辛尼路捱咗3場聯賽後俾球會炒魷，諷刺嘅係會由上季第一個被炒嘅主帥加斯柏連尼接手。巴勒莫班主森柏連尼一向鍾意對球隊事務指手劃腳，隊波開波3戰得1分，炒教練都係意料中事。