民建聯完美配票令人咋舌，難怪受惠於配票而殺入立法會嘅新丁鍾樹根同梁志祥噚日與傳媒會面時，得意洋洋大爆配票秘笈。千年第二梯隊鍾樹根話升呢成功，首要多謝曾鈺成畀灣仔區佢拉票，大爆阿曾最初更一度打算絕迹電視論壇，想根叔一個人「威晒」。
喺新西以尾席入局嘅梁志祥就向主席譚耀宗送高帽，話阿譚肯畀根據地屯門區佢拉票，先至可以尾席入局。原來咁兵行險着嘅一招，都一度嚇到阿譚死去活來，好驚民記三條隊齊齊落選；譚耀宗最終更喺票站閂門前兩小時告急，補底避過意外墮馬。
阿爺只容許建制派喺九龍西出兩張名單，蔣麗芸自然贏得冇其他人咁辛苦。噚日佢聽到黨友講選舉辛酸史，亦一直笑笑口，搞到根叔有啲唔抵得，借啲意向阿Ann話：「你梗係啦，你都唔使做！」唔通係想講阿Ann不勞而獲？阿Ann噚日仲頻頻叫錯黨友何俊賢做何俊仁，你話成班黨友應該好嬲定好笑？