一如筆者所料，那些學院派專家們一地眼鏡碎，美國債台高築，唔推QE根本無路可走，今次QE屈機之處，是每個月大量購入MBS等按揭抵押證券，變相令按揭資產成為無風險資產，刺激銀行更大膽批出按揭，因資金一借出就有政府幫你買入，樓市想唔升都幾難。
QE3利美樓市復蘇
美國樓市一旦翻生，很多行業都會快速復蘇，銀行亦會增加人手，更重要是聯邦政府可以快速增加收入，假如學似歐洲般死慳死抵去減赤，不但招致民怨沸騰，而且客觀效果一定唔好，經濟只會進一步收縮，到頭來得不償失。當地產復蘇，求其賣個政府大樓畀基金都賺到笑，使乜左減右減？最好笑是上周五某台即時找來本地末日博士評論，大力鞭撻兼說QE3效用不大，這種末世評論，不知還會有多少市場？
睇通美國條路，奉行聯繫滙率的香港，銀紙只會大幅貶值，物業則大幅升值，有樓在手切勿沽貨，尤其豪宅賣一件少一件。至於特區政府，應會繼續出口術打壓樓市，但係眼見新鴻基地產（016）都出口術，三低特首又豈敢出手得罪地產商？
除了香港地產股，短期最值得買入的必然是美國地產股，但要買當地地產股（大部份屬REITs）談何容易，同當地樓市直接掛鈎的當數Home Depot，此巨無霸主要銷售建材及家居用品，與美國地產及經濟周期百分百同步，當美國樓市好轉，佢一定掂。創科實業（669）亦十分類似，買唔到美股，專攻創科亦得。
歐陽風