內地演員胡軍08年透過優秀人才入境計劃成為香港人，前日下午佢同太太盧芳和一對仔女去銅鑼灣行街濕平，記者4點幾喺利園商場見戴住黑超嘅胡軍買咗部玩具車仔畀就快4歲嘅囝囝胡皓康，仲即買即拆畀囝囝喺商場推來推去耍樂，原來胡軍太太同11歲大女喺附近舖頭瘋狂購物，胡軍對購物興趣唔大，情願同囝囝喺商場通道嬉戲。
一家四口濕平
胡軍傍住好動嘅囝囝一臉滿足，大概半粒鐘後，胡太同女兒攞住一袋二袋戰利品蒲頭，胡軍好識做咁幫太太和女兒攞嘢，跟住打電話通知司機。不過，原來胡太和女兒仲未買夠，二人將大包細包交畀胡軍後，又去另一間舖頭繼續睇衫，然後兩母女再到附近的Zoe Cafe買西餅蛋糕。胡軍將太太同女兒戰利品放上凌志座駕後，就企喺街同司機傾偈，司機仲抱起皓康，其間胡軍煙癮大發，忍不住當住囝囝面前煲煙，懶理囝囝吸二手煙會危害健康，唔知係咪煙味濃烈，皓康忍唔住用手掩鼻。10幾分鐘後，胡太同女兒買完蛋糕跟胡軍會合，一家四口上車離開。採訪、攝影：羅德光
