揼石仔工場都有階級之分㗎，正所謂同人唔同命，同鎚唔同柄。
嗰邊神情緊張嘅阿玲，阿哥旺陽「被自殺」成百日啦，佢同愛人同埋老友仍然係驚弓之鳥，畀當局監視、隔離、酷刑……種種打壓至放出嚟。無以維生，為咗搵食只好響地盤做散工。阿玲揼石仔，似變相勞動改造多啲。
呢邊阿芬同阿莊就唔同嘞，雖聲嘶力竭仍執正儀容，一下一下揼石仔。點知點數時阿莊發覺：
「吓？我啲石仔分咗大部份畀人，愈數愈少！」
阿芬啲石仔就詭異喇，唔知點解有人響秘道分吓一啲配吓一啲，竟然愈數愈多。阿莊做唔成優秀女工，黯然銷魂。阿芬得戚：
「我今次揼石仔，粒粒皆辛苦，畀人狂鬧都嗗聲吞咗佢─過咗海就係神仙！」
其實一個「分贓不勻」，一個「分贓得米」唧─優秀揼石工嘅原則係：即使工頭私人醒，即使啲懵懵地嘅公公婆婆同埋智障人士一車一車偷運益你，即使第啲工人死死氣彈過嚟……你都要大大聲講每粒石仔都係自己一雙優秀嘅手揼嘅，咁先至上到位。