快做老襯兼爸爸的錢嘉樂，前晚在無綫遊戲節目中成為終極大贏家，贏得兩張環遊世界機票。有份爭機票的薛家燕等人擺明讓賽，令嘉樂仔順利由頭帶到尾，可以帶埋未出世的BB暢遊世界。
現年47歲的錢嘉樂將於11月迎娶37歲湯盈盈，奉子成婚全城恭喜。前晚嘉樂、薛家燕、鍾嘉欣、鄭丹瑞（阿旦）和陳敏之等八名嘉賓齊集將軍澳電視廣播城錄影《環遊世界明星賽》終極賽，勝出者可獲得兩張環遊世界的機票。
家燕做奶媽
雖然鍾嘉欣賽前坦言為爸爸開心，會全力以赴贏機票，可是嘉樂在圈中人緣甚佳，他在後台見到家燕姐即識做她開心，嘉樂說：「我嚟緊會大排筵席，搞薛家『宴』啦。」家燕姐哈哈笑說：「得得得，要帶埋BB去（旅行），到時你買多張機票，我去做佢奶媽。」嘉樂直言視家燕姐和阿旦為最強對手，他說：「如果真係攞到機票真係好幸運，會當係一份禮物，但唔一定係度蜜月機票。」可知BB是仔還是女？他仍賣關子說：「未知，上次照BB遮住咗睇唔到，老婆（盈盈）話到時先公開性別，可能要切蛋糕先話畀大家知。」
贏22萬現金
最終嘉樂不負眾望由頭贏到尾，在擺甫士環節時他與拍檔林曉峰盯準鏡頭，似乎是不容有失，甚至忘記擺甫士。在其他環節上，嘉樂也獲身邊人幫助，答問題時經常有其他嘉賓「通水」，連演戲環節，觀眾的投票掌聲都特別多。最終嘉樂獲幸運之神眷顧，一手抽中雙倍積分的牌，贏取兩張價值近16萬元的商務客位環遊世界機票及22萬現金「大利是」，認真豬龍入水。
採訪：楊潔雯 攝影：陳俊強