唔少市民都覺得，議員選前好親民，選後唔識人，民建聯就屬於呢一類人。話說噚日民建聯嘅新界東葛珮帆、陳克勤同埋落選嘅劉江華落區謝票，約好咗班傳媒3點鐘喺馬鞍山睇佢哋做騷，點知一個二個扮大佬，遲到、缺席乜都齊。十幾個記者準時到場，呆等咗45鐘先等到呢班大爺，劉江華就做代表同記者say sorry，身旁嘅助選團見到劉江華「認衰」，即時將責任攬上身，話係佢哋「行政錯誤」，累到記者要苦等。佢哋仲派人即時喺附近超級市場買檸檬茶補飛，貫徹「派嘢」嘅作風。噚日話晒係劉江華落選第七日，有lego迷就砌咗個落選模型賀一賀佢。