今屆立法會選舉，有好多新人進入立法會，細看名單，原來年紀最小一批，全部係民建聯、工聯會嘅，最細嗰位只有32歲，就係勞工界功能組別（工聯會）嘅鄧家彪，另一位工聯會郭偉強就係34歲，因勞工界有二個議席，工聯會佔其二，故此工聯會可在內部選出立法會議員，幾年輕都冇所謂，於是呢兩個議席隨工聯會鍾意，可以成為練兵基地，呢兩位鄧先生、郭先生如果四年內學習快速，在立法會有所表現嘅話，下一次（2016年）可能配合參加直選。譬如工聯會另一位女將麥美娟41歲，中大新亞書院英文系畢業，1993年一畢業就不知何故，俾彭定康委任為青衣區議員，在青衣島工作多年累積經驗，今年就被派參加立法會競選，憑配票之工，進身為立法會議員。至於民建聯新星李慧琼，38歲已成為區議會、立法會、行會三料議員，民建聯有意無意之間保李棄劉（江華），可見對佢寄以厚望。
民主黨就杰咯，最新進嘅議員胡志偉（九龍東）已經49歲，可見民主黨接棒人甚少。好多人對民主黨青黃不接，有好多解釋，左丁山無謂重複。在三位副局長及兩位政治助理人選宣佈之日，左丁山同一位中大新畢業生講電話，由百萬大道學生靜坐講到中大學生政治取向，佢有如此意見：「以我個人不成熟嘅觀察，中大學生以職業前途劃分政治取向，粗略可分三大類，第一類較為激進，傾向自由民主反建制一派，如果參加政黨政團，會走晒去社民連、人民力量，夠激、鍾意上街抗爭吖嘛。第二類一心想考AO、EO，他日做官嘅，會較為傾向民建聯，我地知道民建聯第一代如譚耀宗、曾鈺成呢批之中，香港精英甚少，英文水平比較低，加入去有比較優勢，容易升呢，最佳例子就係陳克勤喇。嗱，政治助理徐英偉係民建聯，陳岳鵬喺史丹福畢業咁威，都係靠跟建制派葉劉上位嘅啫。至於第三類無意從政嘅，一心搵商界工，穩陣工，不理咁多政治，比較傾向公民黨而不熱心瞓身。講齊晒，參加民主黨一定冇做政助、副局長希望，又難做到立法議員，上街佢又唔夠激，都唔好玩嘅，加入民主黨做乜嘢呀，蔡耀昌咁多年咪行行企企！」嘩，估唔到啲新仔諗得咁透徹，左丁山甘拜下風，80後一代，好多係後生可畏。