九倉（004）主席吳光正睇得上眼嘅女人，究竟係點呢？講緊嘅係48歲中國女首富龍湖地產（960）老闆吳亞軍。吳光正向來精明眼，上周聯交所資料披露，佢私人持有龍湖5%以上，同以往透過九倉入股遠洋（3377）同綠城（3900）好唔同。口痕友估計，吳光正睇中吳總嘅處事作風。
吳總確實係一位有型女強人。齋講兩樣，大部份老闆房大到不得了，又有落地大玻璃，山景海景樓景要乜有乜，吳總偏偏將靠窗位置留畀普通員工，自己個房得百幾呎，仲要得個窗仔。聽講佢又曾經同兩位龍湖高層喺街邊麪檔開餐，埋單9蚊人仔。
吳總舊年成為「胡潤中國女首富」，做得首富依然慳家平實，睇嚟呢種老闆先係吳光正杯茶，合作得過。就連綠城老闆宋衛平都話，同吳亞軍食過飯，都覺得女人當家比較好，吳光正可能就係信宋總呢句話。