蘋機會：概念電話真屈機
上星期正式發佈嘅iPhone 5，唔少人都批評話佢新意欠奉。要鬥新意，不如睇天馬行空嘅概念手機，畢竟外形功能都係「概念」，點玩都得，唔少設計更係相當「屈機」，講緊係佢哋真係屈得㗎！ 記者：韓繼聰
新手機外形似乎都已經走到樽頸位，不外乎四四方方，最多都係玩吓唔同物料，連一向創意爆燈嘅Apple都無乜新花款。但概念手機唔受科技、成本限制，自然點玩都得。唔少設計師都傾向玩「屈機」，其概念都係方便用家將電話圈喺手上，唔使袋又唔使攞住，好似Nokia上年展示過嘅Kinetic概念機咁，展示實物就連OLED芒都可扭曲。其他得意作品仲有NEC嘅Tag，利用形狀記憶橡膠物料製作，可隨你心意扭動屈曲。
Nokia Kinetic概念機
Ondo：1.「Ondo」係一部音樂手機，機上有可分拆的音樂記錄器，中間部份以彈性壓電功能物料製作，一屈一扭即可做出獨特混音效果。機身可分體出音樂記錄器，方便記錄不同樂器聲音。
Rollerphone：2.「Rollerphone」未變身時的手錶形態已經相當搶眼有型，呢款概念手機比之前講嘅每一款都要大膽，就咁睇手錶狀態時，藍光射出時間顯示，反一反手更可拉出半透明手機顯示，將手掌放於耳邊即可講電話。
Seunghan Song概念手機：3.呢部概念源於屋企嘅玻璃窗，晴天時玻璃窗清徹光亮，落雨時則會顯示雨點，大霧時手機就會出現一層薄霧，相當抵死！
Flutter：4.呢部「Flutter」係LG手機設計比賽嘅得獎作品，成個超人變身器咁，㩒掣打開仲有一個扇形顯示屏。
Nokia 888：5.「Nokia 888」有超闊大芒，更勝「Tag」一籌，只要發揮創意就可將「888」變成不同形狀，隨時勁過變形金剛。
Bracelet：6.呢個手鐲形電話「Bracelet」唔算真係屈得，但其三截式設計亦相當有型，當飾物一樣得，將手鐲打開即可變成手機形態，但咁幼，會唔會有啲難揸呢？
NEC Tag：7.「NEC Tag」像一條膠條，可隨意屈曲，除可圈在手上，亦可屈曲成座枱形態。
Snake Phone：8.其實唔少概念電話都以「屈」為創作重點，呢部「Snake Phone」基本上同「Tag」一樣，只係睇落比較厚，應該無咁好戴。