講開內房股，講單宣傳招數八卦嘢。聽講部份內房企業鍾意搵風水師幫手宣傳賣樓，麥玲玲師傅就經常北上，幫萬達、萬科等地產商做宣傳，好多時周末都要跑一、兩個內地城市，講吓樓盤風水有幾好，遇啱師傅推出新一年流年運程書，參觀人士仲有本運程書當禮品收呀。
強國倚重風水賣樓
中國人篤信風水，好似話，唔少內地發展商搵地皮嘅時候已經問過風水師意見，指點日後點樣起、門口開喺邊一邊、幾時賣等等。傳聞有發展商其中一個內地樓盤，因為大門開錯方位賣唔去，拆咗，喺第二邊開番個大門之後又真係賣到，真係唔到你唔信！
但科學啲來講，內地政策一日唔鬆綁，樓市好難起，家陣「金九銀十」旺季都唔旺，所以風水都係用來參考啫。