勿太興奮：阿仙奴
英國老行家有句說法，'The scoreline doesn't tell the whole story.'開季個多月，從未喺貼士框提供過愛隊阿仙奴（紅衫）或者對家，始終又走兩件主力，真金白銀傾注感情票無謂；但只見他們打法越見進步，呢個比見到佢哋今次大炒更欣慰。早段已破門，對呢隊向來擅打上風嘅球隊更得心應手；修頓烏龍中堅凱維特一早傷出，換入冇聞過英超草地味嘅吉田麻也，即係叫呢位日將孭鑊啫。修頓開季全敗不足據，因賽程惡啃兼新埋班，返回主場鬥中下游球隊，仍有可為。阿仙奴大炒也勿太興奮，下場聯賽作客曼城繼續齋睇支持，不過出番文路尼守龍好過施捷斯尼啦！
最爭氣：安頓費迪南
你出言侮辱，又冇講對唔住，仲要同你喺以億計電視觀眾面前握手扮冇事？向來表現好一般嘅昆仔中堅安頓費迪南（5號），上個禮拜六場波唔同泰利（左一）講和有理！從來面對無理批評、撥火，最重要係沉着應戰以表現作最有力反擊，安頓「突然」做到了。佢同下月夠35歲嘅老鬼賴恩尼爾遜捱足全場，踢到傷埋，終能迫使車仔今季在入球紀錄上首次交白卷，正宗爭氣波也！不過下場聯賽作客另一同市嘅熱刺，呢對中堅仲頂得住冇？
不用沮喪：利物浦
名牌利記近年不斷換主帥換血，不過有樣嘢係不變，就係盤路，只要波友唔係佢哋嘅死硬派粉絲，唔難喺佢哋身上搵到食：就係對住中下游隊讓波，直取對家；對住強隊（剋星阿仙奴除外）要捧，因必打高兩皮波，keep住令支持者有無限憧憬。計前晚紅軍表現，對防守好硬淨嘅新特蘭，趁對方射手史提芬費查有傷防線減壓，下半場越踢越好；其實領隊羅渣士機關算盡，掃入愛將，但估唔到，家打得最好、最有朝氣嘅係前朝「遺物」史達寧及舒維爾，下場聯賽迎曼聯若受讓，大家應該識點落注。
玩殘莊家：樸茨茅夫
英甲陷財困嘅樸茨茅夫果然係現時英國各級聯賽最蠱惑嘅一隊，上次國際賽其間，大家睇死佢，但結果作客爆冷大勝卡維尼3蛋，爆出近5倍冷客W；啱啱呢場，主場迎未敗之師華素爾，莊家睇起佢，主W得1.93倍，佢哋又輸1:2。領隊賽後迷茫咁話，新投資者入主新聞得個「傳」字，言談間極為沮喪；對付呢類球隊，冇正路可言，逆思考講分頭至上。
蘋果波神