聯儲局終於推出QE3，承諾每月400億美元買按揭抵押證券（MBS），直至勞工市場令人滿意為止，即係話今次放水冇上限，可謂豁出去。唐牛講過，美股頂唔住，奧巴馬隨時要落馬，到時伯老就要加入失業大軍。伯老矢口否認幫奧巴馬拉票，其實都好正常，唔通狼英會認自己係共產黨員咩！
儲局開爆水喉，資源、地產及出口股最受惠，前兩者早已炒上，相反龍頭出口股利豐（494）今年由高位累跌36%，值博率最高。利豐中期盈利增長33%至3.12億美元，但核心經營溢利卻大跌22%至2.21億美元，主因全球經濟差打擊消費。如今儲局無限量催谷美國經濟，當地生意佔總額逾六成嘅利豐，股價亦有無限憧憬。雖然集團要達最新3年目標機會渺茫，但現價已反映最惡劣情況，強烈反彈可期。利豐上周五收報12.88元，升6.6%，短線先睇14元，中線有望補回8月中大跌裂口，上望16元，潛在升幅24%。
唐牛