呢次選舉，建制派絕妙配票，配到香港人眼都凸埋。除咗中資機構同地區組織幫手之外，原來建制派要靠輸入外勞幫拖。據聞，新民黨嘅葉劉淑儀得到嚟自強國嘅義工效勞。有目擊者話，喺9月9投票當日，呢班為葉劉助選嘅強國大嬸，一邊拉票一邊大跳「秧歌舞」娛賓，連本地嘅葉劉幫義工見到佢哋咁失禮，都冇眼睇，即時閃開劃清界線。太古城話晒係港島區中產聚居地，有泛民義工當日拉票，一到場就見到有位操純正普通話、貌似女幹部嘅師奶駐場指點江山，不斷call馬嚟幫葉劉派單張。經吹雞後有成10多位強國義工嚟幫手，而本地嘅葉劉義工就得嗰幾丁友。
本地義工劃清界線
其中兩位操普通話嘅葉劉義工，拉票不久後嫌悶，竟然喺太古城大跳內地師奶流行嘅「秧歌舞」嚟健吓身。北嫂搔首弄姿，即場令到新民黨嘅娘爆指數有十粒星。目擊者話，本地嘅葉劉義工，見到班強國師奶咁出格，都搖頭苦笑，仲即時退後幾步，擔心有失身份。強國人南下助選其實有迹可尋。噚日《明報》都有報道，建制派港島配票工作係由中聯辦工作部長吳仰偉揸旗，西環嘅「親生仔」民建聯同工聯會獲阿爺分得最多義工，葉劉呢啲「養女」就少一半，學人講「良知」嘅自由黨就一個都冇。八方睇番太古城嘅票站得票，冠軍係公民黨、亞軍係民主黨，葉劉只係排第三，得票少過公民黨一半，唔知係咪因為嗰part秧歌舞太過趕客呢？mailto:[email protected]