禮義廉冒住俾雪糕佬請飲咖啡嘅風險，選舉時出動「掌心雷」，成功爭取做立法會第一大黨，黨主席譚耀宗應記一功！噚日就喺《城市論壇》分享配票心得。不過同枱嘉賓仲有社民連主席、長毛梁國雄，佢又點會畀禮義廉咁得戚，即場玩踢爆，揶揄建制派收咗阿爺咁多錢，用嚟分裂泛民、老屈公民黨，出盡陰招點知都攞唔到過半選民支持，有幾巴閉啫。
遭維園阿伯圍攻
長毛又話禮義廉一直支持政府，乜壞事都支持，模仿曾鈺成句soundbite話：「撐社民連上街，撐民建聯上當，大家最憎嘅嘢，民建聯所有都有畀票政府！」譚Sir被窒到面燶燶，竟然答咗句：「家唔係競選論壇，唔講呢啲嘢……」長毛繼續發炮：「我讚你咋，讚你贊成領匯上市，民建聯成功爭取領匯上市呀！」《城市論壇》話晒係維園阿伯嘅主場，佢哋又點會任由長毛肆意批評愛國愛黨、又派米派糖嘅禮義廉呢！阿伯紮行馬，一手大聲公，一手指天空，起勢爆粗辱罵長毛，長毛惟有尋求「政治庇護」，叫一直聲稱對暴力言行零容忍嘅譚Sir控制吓佢嘅支持者。