鄭皓政，15歲，五國混血兒，父親擁有英國、非洲、葡萄牙及西班牙血統，又是知名工程師，曾參與興建會展。小子加拿大出生，回流香港，出生在中上家庭，卻因鬈毛和皮膚黑被嘲笑。自卑男孩自我形象低落，四年前愛上游水，自此膽怯「鬈毛黑」變身醒目飛魚，下月還處子下海，首度參加維港渡海泳，入選成為1,500名健兒之一，挑戰自己。
記者：呂麗嬋
「有啲混血兒金髮藍眼，我就皮膚黑黑，似足非洲人，同學都叫我鬈毛黑，出街啲人又會同我講英文。唔知係咪因為咁，自細，我就無乜自信心，讀書中規中矩，大我兩年嘅哥哥，乜都叻過我。中一嗰年，學校話50秒內游到25米直池就可以入校隊。試水達標後第一次操練，隊友一見到我就話：你生得咁黑，游水一定勁啦！
又係因為黑。只係，今次唔係畀人笑，而係對我有期望。嗰時，其實我仲係hea游，游得好慢，但係啲人以為我好勁，所以我好心虛，怕隊友失望。好在有教練鼓勵我，我就叫自己勤力啲練習。結果，成績真係越來越好，中三嗰年，仲獲選游接力。以前，25米直池游48秒，家32秒就搞掂，仲訩埋獎牌，好開心，因為我終於有樣嘢係叻過阿哥！
完成賽事可留港讀書
哥哥大我兩年，家喺加拿大讀書。我哋兩兄弟同媽咪感情好好，之前嘅暑假，媽咪安排我一個人跟教練去菲律賓學潛水，學習獨立。原本，今年新學期，我會跟阿哥去加拿大讀書，但媽咪竟然同我約法三章，佢話今年10月舉行維港渡海泳，如果我試水合格，成功完成賽事，就可以暫緩去外國讀書！
覺得水如母親的擁抱
我唔想離開屋企，試水嗰日博到盡。人哋留前鬥後，我就因為太肉緊，前段游得太快，差啲唔夠氣！好在，最終都過到關，訩到參賽資格。家距離正式比賽仲有個幾月，我除咗加緊練習，仲請教高人游渡海泳嘅秘技。原來，為減少水阻，千祈唔好帶頭；仲有喺前段記住唔好心急游咁快，以防後段冇氣。
渡海泳今年係第二屆，我上年已想參加，只因錯過咗報名，今次心願達成，加埋同媽咪嘅約定，我一定會盡力而為，因為我知道，媽咪會一直喺現場為我打氣。我講你知，我咁鍾意游水，其實係因為我覺得啲水就好似媽咪嘅擁抱，同媽咪一齊游，我唔會再膽怯。
