「如果係都要喺QE加上一個期限，我希望係一萬年！」相信以上設計對白應該都係聯儲局主席伯南克嘅心聲。聯儲局上周四推出無限期QE3，每月400億美金買按揭債，加上之前歐洲央行嘅無限量買債，會為市場帶嚟乜嘢影響？
根據聯儲局數據，停泊美國銀行體系嘅資金已經有1.7萬億美元，包括1.5萬億美元嘅銀行過剩儲備金，同超過2萬億美元嘅企業資金，銀行寧願收0.25厘嘅超低利率都唔願外借，講到尾係市場上缺乏有利可圖嘅投資項目，銀行自然冇條件放貸出去。過多一段時間，央行放水只會演化成為高通脹，到時現金被通脹蠶食購買力，銀行就迫住再借錢出去，然後股市又炒上，但之後借出嘅錢又恐怕會變爛賬，經濟始終疲不能興，呢啲就係叫做滯脹。
雖然上述問題唔會因為QE3推出而解決，但股票最重要都係講價錢，當恒指市賬率只得1.41倍嘅低水平，即使面對家嘅困局，只要暫時冇出現令市場恐慌嘅因素，市賬率升到去1.7、1.8倍又點會冇可能，1.8倍嘅市賬率，講緊係恒指約26000，已經係兩成以上嘅上升空間。
如果買個市繼續升又冇乜心水，好多人會買港交所（388），其實惠理集團（806）都係唔錯選擇。
惠理有個缺點，亦係佢優點，就係有高水位（High watermark）機制，即係基金炒股賺到咁上下，Meet到High watermark先會賺到個大Bonus，所以當基金成績去到接近High watermark時，股價追落後能力特別強，但暫時都未有耐會到。
中線目標5.8元
上周五惠理急升11.7%至3.83元，家唔需要即刻買入，因為呢隻股絕少連續急升，可以等多兩三日，睇吓升市係咪健康再落注都未遲，中線目標睇番2月高位5.80元唔過份。
呢類股易定止蝕位，如果跌番落去低過上周五開市價3.52元，就證明大戶對後市信心動搖，可以走先。況且過往幾個月升市嘅途中，惠理出現首支大陽燭後，絕對唔會調整到去太陽燭嘅起點以下，用呢個位做止蝕，相當易操作，無論波幅定係玩法都好過、易過港交所，可以當係恒指嘅變倍器，實在好使好用！
晉佳
本欄逢周一、三及五刊出