香港桌球「1哥」傅家俊（Marco）一向係素食主義者，最近就喺上海出席上海大師賽。噚日佢趁未有波打，去咗當地著名嘅龍華寺搵食，點知普通話突然失靈，「吃素」變「廁所」，搞到Marco哭笑不得；更想唔到，同日喺上海桌球大師賽行紅地氈時，被司儀攞嚟取笑。
行紅地氈俾司儀笑
Marco噚日喺龍華寺門前問售票員：「請問裏面有『吃素』的嗎？」對方竟然回答話：「有的，裏面是有廁所的。」一個搞笑嘅誤會，令Marco忍不住放上微博同大家分享，仲話：「我嘅普通話仍有待改善。」講真，Marco算係香港運動員中嘅語言天才，英語了得之餘，普通話都算靈光，可能係上兩個月喺英國打比賽，上星期至返香港，期間少講普通話，先搞出今次笑料啫。
最慘就係，同日黃昏出席上海大師賽要行紅地氈時，傅家俊同前世界冠軍希堅斯一齊行，司儀特別叫咗Marco上台傾偈；司儀開聲第一句就係「吃素」、「廁所」，仲叫Marco即場再講一次，Marco就幽佢一默咁用普通話講：「我想先走。」當然，Marco再講「吃素」及「廁所」後，獲司儀大讚發音標準，可能真係龍華寺售票員嘅耳仔唔靈光。
搞笑過後，Marco今午2點半已開始打外卡圈（見附表），對手仲係細自己19年、得15歲嘅現任世青冠軍、中國嘅呂昊天；而Marco亦喺97年攞過世青冠軍㗎！上星期喺英國一個PTC（職業桌球員巡迴錦標賽）第3站攞咗亞軍嘅Marco，信心有一定提升，希望佢未來幾日喺上海，桌球關關過之外，仲可以順順利利搵到「素食」啦！
