認識了一位擅於fusion菜的大廚，從他的菜式中發現了所謂fusion的一個特點，就是為味覺增加刺激。而這些刺激，很多時係來自大對比的配搭，乾的加點濕的，苦的配合一點辣，鹹的就附上一點甜……原來味蕾是會偷懶的，就如食慣甜的對甜的感受就會減弱，但若果滲入一口鹹的，那下一啖的甜就更加sweet了，難怪阿嫲以前吃西瓜會灑上兩口鹽，原來她一早就知道fusion之道了。每個周末睇愛隊的直播本來就是一周頻撲後的甜點，而為了令這場波睇得更甜美，通常都會在坐低梳化前先加插一些地獄苦練，不過最近秋風起，其實落街跑幾個圈本身就是一大樂事，於是也樂得跑多幾公里，流多幾滴汗才慢慢嘆重份量的薯片汽水。你說是甜我說苦，你好恨睇波，而同時亦有唔少人好嬲你掛住睇波，咁於是乎為咗有好日子過，你賽前嘅地獄賽程可能就唔係好似我招呼自己咁簡單，而係要過五關斬六將搞掂晒身邊人，令到佢哋心滿意足之後，咁先到你自己happy。又會唔會你完全唔同意我嘅講法，皆因你可能會覺得睇波係天下間最悶蛋嘅事，反而跑步先至係最佳活動呢！其實我本身就有朋友係咁諗嘅喎，而佢哋又有佢哋嘅道理喎。響佢哋眼中，足球圈簡直係百毒之地，未開波之前，是非傳言嗌交桃色新聞乜都齊，開波之後又充斥住假波黑哨插水唔多夾嘅煩事，對我呢班純潔跑手嚟講，足球圈就如娛樂圈一樣咁複雜黑暗，諗真啲，佢又冇錯喎。相比之下，跑步又真係正氣簡單得多，冇出術冇呃人冇黑幕，前排劉翔嘅謠言都係多得傳媒抹黑，唔多關當事人事。唔計少數以身試法食禁藥嘅例外，跑步就係優勝劣敗咁簡單嘅遊戲，參與其中係樂事，不過以睇電視當娛樂嘅話，跑步又確實冇咁精采。所以要來一個運動fusion菜的話，我都係揀波睇人踢，步自己跑。文：keymannow TV主持mailto:[email protected]