千億新抱徐子淇前晚自爆三個子女日前染上諾沃克病毒（又稱諾如病毒），又屙又嘔，幾乎嚇壞李家上下，幸現已痊癒並返學了。子淇昨晚又和李家誠拖手到灣仔君悅，她表示是細仔先發病，然後傳染給兩個姊姊，三個金叵羅都病到消瘦，令子淇很心痛。
現年29歲的徐子淇06年嫁給恒基主席李兆基二子李家誠，婚後火速造人，先後誕下長女晞彤和次女晞兒，去年更誕下「慈姑椗」三子俊熹。前晚英皇在會展舉行70周年慶典，徐子淇和老公李家誠、老爺李兆基畀面赴會。提到子淇的三個金叵羅，她透露：「之前小朋友患咗諾沃克病毒，成日屙同嘔，家好番晒。」
「個個瘦晒好心痛」
昨晚子淇和李家誠拖手到灣仔君悅酒店，出席英文雜誌創刊35周年派對，再提到三子女染諾沃克病毒，子淇說：「佢哋好番啦，病咗三日，好快好番，好在大人冇事。」子淇謂三子女染病時令她好心痛，她說：「佢哋嘔咗好多，搞到我好擔心，一嘔唔食得嘢，只可以飲寶礦力同食粥，個個都瘦晒，好心痛，尤其係細仔，佢好BB，嘔就唔飲得奶，佢好肚餓，攬住奶樽冇得飲，不過佢冇喊，因為嘔到冇晒力，瞓喺度挨住我。」
問子淇可有擔心到喊？她說：「OK啦，明白呢個係小朋友必經階段，發燒同病吓，好多媽咪出街會幫小朋友抹手消毒，但我唔係好緊張，小朋友有少少細菌，打贏咗會強壯啲。」由於諾沃克病毒是因污糟才感染，問是否對子女保護不足？她說：「囝囝成日放隻手入口，啜晒四隻手指，仲周圍掂，而且會爬地，係細仔發病先再惹畀家姐，同一間屋好難隔離，好在冇傳染畀大伯嘅小朋友。」
問子淇會否請家庭教師避返學染病？她說：「一定唔會，咁會冇咗群體生活，我好鍾意佢哋返學，我同老公都唔嚴，教唔到佢哋，等專業人士去教，佢哋返到學校好聽先生話，二女晞兒喺學校係模範生，要做老師小助手，但喺屋企挑戰我試我底線，試過接佢放學，佢好大聲話唔要我要爹哋，但上到車就話掛住我。」
預告中秋在家玩火
子淇前晚表示只有1歲多的囝囝俊熹亦已返playgroup，她說：「三個都返學，日日接返學放學好攰，佢哋返學就開始問我好多問題，我幾乎唔識答，要佢哋講番答案畀我知。」問到大伯李家傑的三胞胎是否亦上學？她說：「係呀，屋企好嘈。」李家誠即笑着更正：「係熱鬧，開心嘅。」中秋節將至，子淇竟表示會跟子女在屋企玩燈籠和玩火。
採訪：採訪：林嘉慈、譚倩宜、胡比
攝影：黃文偉
話你知：諾沃克傳染風險高
徐子淇與李家誠的三個金叵羅日前染上的諾沃克病毒（又稱諾如病毒），是高度傳染性的疾病，患者感染後會出現頻密的噴射式嘔吐、惡心、腹瀉及肚痛等病徵，隨時屙嘔到脫水。傳播途徑包括不潔的食物和水、人與人之間的接觸等，高風險的患者包括幼兒、老人和孕婦等免疫力較弱人士。要減低感染風險，應避免進食未煮熟的食物，尤其是海產，要徹底煮熟才能進食。患者要在痊癒後最少兩日才可處理食物，減低傳染機會。