在70年代一家人大叫「開飯喇」扭開電視的日子，就有甘國亮編劇的劇集做餸，他打過的電視戰役不少，當中《輪流傳》跟《大地恩情》一戰到現在都可以是談論話題。反觀今日的電視戰國時代，作為舊一代電視人的甘國亮卻自言年紀大無心戀戰，美其名是不想浪費別人青春，事實上是道不同不相為謀，反而開開心心拍自己喜歡的電影好過。愛情甘國亮亦曾經擁有過，惜現在已沒有多餘心神去開展一段戀情，愛情從來都是一件奢侈品。撰文：何永寧
免費電視進入新戰國時代，新勢力招兵買馬，舊勢力換老闆，名宿王晶更身體力行重投視圈拍劇，同是名宿的甘國亮自言年紀大無意參戰，他謙虛的說：「冇必要浪費佢哋嘅青春，家電視人諗嘢嘅方式同我唔同。」
實戰磨鍊健筆如飛
說甘國亮謙遜並非抬舉，不少60後當年就是用他的電視劇集送飯養大，當年一句「開飯喇」，等同開電視睇劇，扒着媽咪的飯，雙眼就掃着甘國亮的《孖生姊妹》、《山水有相逢》和《執到寶》等當餸，消夜還有他寫的《歡樂今宵》趣劇。
甘國亮笑言當年日做夜做沒停手，跟今日工廠流水作業，又向外國劇集「致敬」的電視生態截然不同。回想初入行，他說：「當時劉芳剛老師介紹我畀King Sir（鍾景輝），跟住King Sir畀咗份皇家警察檔案叫我譯同編，見到人攞住我寫嘅資料去拍，實戰嗰時真係進步神速，喺編劇班畢業一年已經可以寫自己嘅劇本，之後寫埋《歡樂今宵》趣劇。」更神奇的經驗莫過於「睇餸煮飯」，他說：「嗰時最紅嘅係伍衞國同呂有慧，導演同我講『喂，伍小生有一個鐘期，呂有慧就有三個鐘，一廠同三廠就有兩個鐘，你就住嚟寫古仔啦』，拍劇好似照單執藥，呢啲技能好似打木人巷咁練出嚟。」
劇集腰斬悲如喪子
電視大戰甘國亮參與過不少，最慘痛的一戰是有份編劇的劇集《輪流傳》大戰麗的的《大地恩情》，原定80集的《輪》劇由於收視不佳，先是調時間繼而腰斬，甘國亮以喪子來形容事件：「要形容嘅話你可以話佢係悲劇英雄，好似你死咗個仔咁，佢係英年早逝，但係你又點知個仔大咗會有出息，反而啲人仲會同情我，我覺得係賺咗。」
事業上賺了，跟鄭裕玲的愛情路上也同一道理，甘國亮說：「同佢拍咗拖十年你話冇開心過就呃人啫，期間大家分享咗咁多好嘅嘢，好多嘢冇得計，幾多人拍拖結婚，幾年後離婚咁又點計，人海茫茫可以互相畀到快樂對方已經好足夠。」他自言愛一個人很花氣力，特別是自己凡事都會以對方行先的性格，假如不能夠將最好的給人，乾脆選擇不開始：「現在連愛自己都唔知道得唔得嘅時候都係算啦，始終人老咗就係老咗。當你好多能力冇咗嘅時候，心態都會隨之變老。」
甘國亮當年跟張藝謀合作《秦俑》的製作，近日再執導電影《熱愛島》，他以久疏戰陣來形容整件事：「唔係要怪任何人，事實係家電影人太少實戰經驗，自己亦太耐冇拍戲，所以有好多唔完善地方。」看完試片居然發現戲中會有打燈用的燈腳出現：「代價係用4,600蚊執走佢，錢係用嚟補鑊唔係完善部戲，我會覺得好可惜，工作人員唔係蠢同懶，只不過香港電影真係太少機會。你睇番80年代，一個幕後仔一年都可以做12部戲，幾渣都可以變叻，當年一班幕後係靠密集式鍛鍊返嚟。」
窮途末路變招求生
引領甘國亮當導演的，是被喻為cult片王的已故導演桂治洪，當年桂治洪所用的實景拍攝手法，都是逼出來的產物，甘國亮笑說：「嗰時邵氏嘅廠，永遠搭咗啲景打世界光，一個畀李翰祥，一個畀張徹，就算佢哋唔拍，都冇人可以用，咁咪要出去拍囉。大明星嘅期都係，冇工開都要留畀呢兩位導演，桂導演咪要用我呢啲新人囉，好多嘢都係窮途末路逼出嚟。」如此這般甘國亮成為cult片《蛇殺手》的男主角。