走出娛樂圈紙醉金迷的生活，徐淑敏婚後醒覺不能重覆當年的渾噩，拒做悠閒少奶，為自主「發奮」賺錢。選完港姐後，Suki入行翌年即07年，已賺到人生第一個一百萬，「無可否認喺娛樂圈行運嗰陣好容易賺錢，出席一個活動，講幾句已經有錢收，最高峯每個月可有10個外快工作。當時雖然租住萬二蚊嘅都會駅，加埋供車、畀家用，每月基本開銷要5萬蚊，但一兩個job已冚到。」不過，風光短暫，「當時諗嘢唔長遠，負債，我仲走去落10萬蚊訂，買一架50萬嘅跑車。點知臨時被捉去拍劇，三個月都賺唔到外快找數，只能靠出糧逐月清數，後來甚至淪為負資產。」她坦言，圈中不少人都因不懂控制開支而陷入財困，「唔可以再咁渾渾噩噩」！
「金錢帶給女性自由」
Suki出身於基層家庭，小時候也經歷過連洋娃娃也買不起的日子。灰姑娘其後嫁得有錢白馬王子，但她澄清，自己並非以此標準覓偶，「細個冇諗過呢啲，我拍過四次拖，其他三個都係正常人家，只得家老公富裕，有能力達成我嘅夢想。」理應自此過上幸福少奶奶生活的Suki卻決定創業，「金錢可以帶給女性自主同自由，若純粹做一個家庭主婦，靠老公賺錢，食佢、住佢、着佢，可能連講句嘢都唔敢。」