狂躁臭史1：陰招蝦細路
「狂躁」虐待女藝人單嘢揚咗之後，佢嘅臭史陸續有來。原來狂躁除咗蝦大人之外，就連細路仔都唔放過。聽聞有啲小演員拍喊戲喊唔出，狂躁就出陰招捏佢哋，捏到佢哋喊。小演員啲家長喺現場通常坐喺個mon前面睇住自己啲小朋友拍戲，狂躁每次捏小演員，就會用背脊遮住攝影機鏡頭，家長睇住個mon只係見到狂躁背脊，完全睇唔到自己仔女點被狂躁虐待。
狂躁臭史2：玩殘老演員
狂躁鍾意蝦細路同新人，就連老牌演員都受害，好似演戲多年嘅「柯德莉」，都曾經試過俾狂躁玩殘。柯德莉一向粗口橫飛，個個都冇面畀，狂躁當年未升職，係負責演員通告嘅嘢，柯德莉唔抵得狂躁咁乞人憎，於是成日幫人爆粗鬧佢，點知狂躁懷恨在心，試過特登編排柯德莉凌晨一點先至開廠，跟住晨早7點再出外景，等佢老人家冇時間休息。
狂躁臭史3：平樓益高層
狂躁有高層包庇所以橫行無忌，盛傳狂躁係高層親戚之外，聽聞狂躁女友係內地樓盤營業部高層，06年狂躁為咗巴結高層，叫女友用成本價賣咗內地一個出名樓盤一個3千呎單位畀高層，貪得無厭嘅高層再叫狂躁用同樣價錢賣咗另一個單位畀自己一位老死，而狂躁同女友就買咗同一幢大廈嘅單位，等平時放假約埋高層一齊返內地度假聯絡感情。Text by關仁