琴日報導過優秀嘅馬伕宗。今日出場係叮噹馬頭嘅樓面英，睇吓又坐唔坐到各行各業優秀員工大賽嘅寶座啦：─
話說黃生一家同親戚去酒樓食晚飯，叫咗補腦嘅天麻川芎魚頭湯。呢鍋湯一上枱，大家發覺有啲唔妥。
黃太心水清，指住啲黑麻麻嘅嘢：「呢啲乜嘢嚟？」
樓面英過嚟一睇，就安慰佢哋：「哦，係本店最拿手嘅魚頭湯吖嘛，啲料冇乜大礙，大廚話佢哋唔係石頭爆出嚟嘅，內地秘方一早就有，家響香港分店都係沿用唧。」
「究竟係乜你無謂兜圈。」
「係唔覺意跌咗隻死老鼠之嘛。」
「吓！容乜易食壞我哋啲細路會生腦癌㗎？」黃生一家大怒：「我哋唔飲喇，撤回啦！」
「喂，我已經幫你地撥開咗隻死老鼠，湯重可以入口試吓會唔會腦癌至算。而且成圍枱有人鍾意呢啲蛋白質，可以自己決定點飲法，飲幾多。為咗本店同大廚面子，撤回就等於禁止，唔符合香港人自由口味同多元化吸收，總之呢鍋湯就算有毒，都唔撤回㗎嘞！」
老闆見樓面英攣都拗得直，大讚佢忠心又夠蠱惑。