香港特首民望每況愈下，有時政治魅力呢啲嘢，真係唔係話谷就谷；好似美國總統奧巴馬，上周五喺白宮接見倫敦奧運同殘奧超過400位運動員，一舉手一投足都充滿光采，冧盡一班運動員；當中最驚喜係剛打破世績嘅「欄王」A米列特（A米），佢話估唔到奧巴馬會認得佢喎。
雖然奧運完咗成個月，不過美國代表都等埋殘奧完成，先一齊拉大隊見總統；上周五奧巴馬就帶埋第一夫人米歇爾，同副總統拜登，同呢班國家英雄會面。原本奧巴馬嗰日行程好緊湊，不過佢堅持要同全場咁多人逐一握手先肯走；奧巴馬講笑咁講：「我要試吓被人拉走嘅滋味。」結果奧巴馬握手都足足握咗成個鐘頭。
白宮接見奧運代表團
美國先喺倫奧取得104面獎牌，其中金牌有46面，壓過中國做番「1哥」；而喺殘奧就共獲98面獎牌，僅次於中國、俄羅斯等排第6，而國內就有270萬電視觀眾欣賞，打破歷屆殘奧收視紀錄。奧巴馬盛讚運動員：「比獲得獎牌更重要，係你哋喺奧運會嘅表現更為激動人心，特別為年輕人樹立榜樣，我為你哋驕傲。你哋展示美國形象，我再搵唔到更好嘅國際大使。」
費斯低調坐埋一邊
奧巴馬唔只講嘢叻，連認人都好叻；佢一眼就認得男子110米欄金牌得主、兼新科世界紀錄保持者A米列特，奧巴馬向A米祝賀時，仲好親切咁叫佢「跨欄佬」（the hurdle guy），原來A米都係支持奧巴馬，仲講08年總統大選前，佢剛去世嘅祖母，已經講佢可以當選。家奧巴馬要競選連任，除咗之後又搵NBA球星戴歷路斯同勒邦占士，搵埋A米大打運動員牌，宣傳效用一定好高。
不過美國飛魚費斯，可能參加過3屆奧運累積18金，去白宮都去到慣，只係戴住黑超靜靜咁坐埋一邊，完全唔夠A米或者米曹搶鏡。而擔任奧運開幕禮持旗手、劍擊美女莎根妮絲，就將開幕禮所用嘅國旗，送畀奧巴馬留念。