政府噚日宣佈新成立一個「為無律師代表訴訟人提供法律意見督導委員會」，選管會前主席彭鍵基（圖）法官獲委任為督導委員會主席，身任高等法院原訟法庭法官嘅彭官，好快就退休，以佢喺公共服務同司法界嘅經驗，對將喺年底推出嘅為無律師代表訴訟人提供法律意見嘅兩年試驗計劃，應該可以畀到有益同有建設性嘅意見。
督導委員會委員有大律師公會、香港律師會嘅代表，同時亦有民政事務局同法律援助署呢啲政府機構代表，全部都係相關嘅專業。
最奇怪係啱啱當選立法會議員、被公認為「梁粉」嘅謝偉銓，都被委任為委員，佢係測量專業人士，被委任似乎幾無厘頭，唔通又係CY關照？