落選嘅方國珊前日向廉署投訴，指上月去調景嶺豪宴酒家拉票時，發現一名為葛珮帆助選的民建聯職員，同10名街坊食飯，之後負責埋單，似有賄選之嫌。方國珊噚日向八方報料，聽聞該職員已經被炒，睇怕內情絕不簡單！
上任後首次訪京
方國珊又投訴投票日民建聯接送好多長者去投票，有人更提供貼心服務，喺長者手掌心貼上有號碼嘅標籤，老人家入到票站，睇睇呢張「掌心雷」就知應該投票畀邊個。件事俾《蘋果》揭發，正喺北京訪問嘅廉政專員白韞六，噚日話已收到呢單投訴，會跟進調查。
呢次係白韞六上任後首次訪京，佢話係禮節性拜訪，向京官介紹廉署工作；至於有冇提到發展局前局長麥齊光涉騙取租金津貼嘅畸士，白韞六話冇，強調唔會評論個別個案。