選舉結束，有人喜，有人愁，取代劉江華喺新界東攞到議席嘅葛珮帆，話自己心情沉重，因為「師傅」劉江華輸咗，冇得重返立法會，不過佢會請教劉江華，如何適應新一屆議會，相信面對激進派抬頭嘅議會文化，亦應付得來。
自嘲競選時雞手鴨腳
葛珮帆由劉江華一手帶入政壇，佢話大選日晚上結束投票後，知道票站調查結果，自己好有機會，確係好開心；不過隨即傳出劉江華唔穩陣消息，佢自言即刻笑唔出，心情好似過山車，大喜大悲，唔止感到傷心，更加係難以置信。
八方相信劉江華對呢個結果都難以置信，最難相信嘅，可能係成為棄保犧牲品。而新丁葛珮帆形容自己競選時反應唔夠快，有時更加「雞手鴨腳」，日後要練好啲反應，否則四年後，好難連任。