本年度各行各業優秀員工大賽，排頭嘅領先幾條街。今日報導一向沈着應戰喜怒不形於色嘅宗哥。身為馬伕大王，佢形象可靠，啲囡囡都好聽教聽話，唔多敢逆佢意。之不過近排有位嫻姐好唔妥佢，嬲到紮紮跳。我地睇下馬伕宗點樣化解：─嫻姐最㷫就係畀人客：「你地出埋啲揦鮓招，晨咁早就話我唔止夠客啲客仲多到瀉，做唔切，唔好嘥，你揸主意過晒畀阿琼㖭。熟客吖嘛，我好嬲，好心痛─」馬伕宗連忙撫慰：「唏，嫻姐你出嚟做咗咁耐，乜嘢風浪未見過吖？阿公都知你唔會同細路女嗌霎！」「咁又唔係咁講喇，話晒啲客一個一個箍番嚟，我幾時出山佢地幾時撐我。阿琼冇乜客，一告急就嚟─」「飲杯茶先。」馬伕宗招呼：「你地都唔同級數，咪畀少少着數細嘅囉，啲叔伯嗒佢糖吖嘛。」又皮笑肉不笑：「算啦，客嘅嘢，你有佢有，接完就冇問題㗎啦！」嫻姐無奈：「我忍你好耐嘞！」「咁咪忍多陣囉，忍忍吓就過咗去啦……」三扒兩撥擺平咗。