6屆桌球世界冠軍戴維斯捲入「打假波」醜聞，另一位前世界冠軍、澳洲靚仔球星羅拔臣（上圖左），噚日就喺尖東舉行嘅名將盃決賽盡顯功架，7:6反勝禾頓，其中一局仲一Q打出104度（下圖），來港短短幾日，狂掃13.5萬獎金，真係爽爆！
雖然只係表演賽，但兩位球手都好認真，禾頓一度領先6:4，只差一局就可以贏波，但30歲嘅羅拔臣不愧為頂尖球手，唔單止抵受得住壓力，仲示範「起break」，第12局打出賽事最高嘅104度，睇到300名觀眾拍爛手掌，追成6:6，決勝局再贏71:18，反勝7:6。
羅拔臣首次喺香港獻技就捧走12萬冠軍獎金，仲額外獲得1.5萬嘅最高度數獎金，難怪大讚香港係福地，「呢筆錢會儲起，亦都會買玩具送畀兩歲大囝囝Alex，成個星期冇見佢，好掛住佢呀！」佢今午飛去上海，準備下星期一展開嘅上海大師賽。賽事搞手黃日洪見球迷反應咁好，打算下屆邀請「花花公子」鄧立普（Judd Trump）同中國首席球手丁俊暉，吸引更多粉絲入場。