改編自人氣網絡小說的3D三級片《一路向西》，熱炒男人北上尋歡，憑該片首圓導演夢的胡耀輝，不但在電影拍出向西神髓，離開水銀燈，他也向西上身，變身搞笑「肥輝」，獲暴乳骨妹張暖雅、何佩瑜（Jeana）和郭穎兒（Celia），提供六手按摩服務，胡導連聲爽爆，還笑言不准cut機。 撰文：比華利
《一路向西》香港上映日期：9月20日
網絡人氣作家向西村上春樹的網絡小說《東莞的森林》是由北上揼邪骨開始，改編自該甜古的3D電影《一路向西》也以原著為中心，首執導演筒的胡耀輝（Mark）為力谷《一》片宣傳，他日前接受訪問時，帶同女主角何佩瑜、郭穎兒和張暖雅親征尖沙嘴一間桑拿中心，四人即場上演搞笑版《一路向西》。
肥輝等起三飛
Mark更衣後趴在按摩床，任向西女Jeana、Celia和張暖雅替他做全身按摩，三女分別由頭到腳貼身服侍，他立即抵死說：「我敢講呢個骨場嘅女仔係佢哋，生意一夜之間必定成為全地球最好咁滯。好彩今日我冇安排男主角嚟，我就可以起三飛。我等呢個機會等咗好耐，部戲不如唔好上住，等我可以一路係咁做呢啲訪問。」
雖然Mark是編劇出身，曾在《3D肉蒲團之極樂寶鑑》中客串諧角，叫觀眾忍俊不禁，所以要他肥輝上身也絕無難度，他笑言：「我家真係勁過向西，佢都係得一個楊采妮啫，我有三個，勁到不得了。」說時遲那時快，Jeana、Celia和張暖雅分別出力夾擊，能獲宅男女神出手服侍，Mark得戚說：「相信做完呢個訪問，我一定會俾人打小人，身上出紅疹，個頭俾人掟飛鏢，冇人唔羨慕我，肯定成為全港公敵，點解佢哋嘅女神幫我揼骨。」
親選肯博女角
Mark這次處男執導《一》片，還做埋編劇和客串嫖客，一身兼三職，可謂過足癮，他說：「蕭定一堅持要我演埋一份，演戲真係唔係我強項，加上第一次做導演，好驚兼顧唔嚟。記得嗰場帶女開房戲，我邊演邊導演，埋位後又唔記得除眼鏡，真係幾精神分裂。」
始終《一》片床戲掛帥，必嚴選女角，圈中樣靚身材正，肯博肯露又好戲的女演員寥寥可數，Mark為選角花了數月在中港台日四地揀蟀，他細數眼前三女：「小魚一角非Jeana莫屬，網民一致投選，仲唔係度身訂做。偶然我發現張暖雅嘅英文講得好好，佢演向西英國女友，鬼鬼哋好啱。」
至於Celia試鏡時，獲悉角色要裸露，她全部say yes，直到離開都沒問過誰是對手，Mark便好奇反問，怎知Celia回答：「乜唔係你（指胡耀輝）咩？」Mark欣賞Celia的爽快和誠意，決定也給她晉身影圈的機會。