泛民散兵游勇，槍口未一致對外，選民一人兩票定命運，敗家亦無怨無尤。擁大量國腳嘅英超列強，國際賽後登場復有歐聯後顧，恐三心兩意；小弟有戒心，今輪寧全閃避。一周博兩場：英超異稟「天鵝」史雲斯及主場特勁嘅雷丁。
正牌莊家從來對英超強隊極為「眷顧」，亦唔擔心波友唔落叠，所以波友專攻某一強隊，值博率更蝕底；好似若鍾情曼市雙雄，季初喺聯賽長追佢哋[-1]共6次，結果只係上輪曼城靠完場前入多昆仔一粒，贏3:1熱食1.5幾倍嘅「主勝」，即波友平注追輸4注半；難怪對面版嗰位譚拔士兄，重心選擇好少揀英超強隊。
自己冇恐強症，反而真強隊定扮強隊都好，英超對於傳統高Q大棍嘅踢法，逐漸唾棄，個人對此不敢苟同；冇咁大個頭，咪戴咁大頂帽，利記自恃大會要玩優雅棄安祖卡路爾無可厚非，但昆士柏，真係有排執；又好似史篤城，靠呢種暖水壺一味靠滾嘅戰術，咪自08年起升班後企得住腳。不過，當出現「異稟」好似「天鵝」史雲斯時，真係要多望兩眼。
小球會史雲斯由勞特立接任後，承前朝地面踢法，對手可能未洞悉佢哋新兵嘅虛實，錄得開季兩連捷；就算上次主場陷困境，包括兩度落後極硬淨嘅新特蘭，並有一中堅領紅及一左閘斷腳，仍保不敗保住士氣，小本經營踢得悅目打出成績，一啲都唔易；今周作客雜牌軍嘅維拉獲受讓，鑑於客軍後防有兩主將缺陣，呢種踢法喺心仍雄下威力極強，轉攻入球「大」兼冷W，唔貪嗰半格嘅下盤。
另一選，周日場獨腳戲雷丁迎熱刺，兩隊都未開齋，波亞斯仲執緊熱刺隊波玩地面進攻；雷丁則肯定硬橋硬馬，若翼鋒占美基比復出，必多用兩翼側擊讓「坦克車」普格恩耶克攻堅。若波帥肯多用側擊，呢場波入球會好多；但雷丁起碼保不敗，個人信心度較強。
死黨嘅好友咖喱，脫離白鴿黨努力地區工作多年，終一戰功成爆冷躋身立法會，異稟唔易做，祝願佢喺呢個新戰場仍能笑傲獨行，為民打拼，發光發熱！
（下次見報：18/09）
文：蘋果波神
周末精選
正：阿士東維拉「大」
副：雷丁勝[+1]
冷：史雲斯勝