賽馬開鑼日，碰到馬主N，當日倫敦殘奧尚未舉行閉幕禮，問佢點解唔睇完就返嚟？馬主N話：「去捧香港隊場，賽事完畢後立即趕返嚟，點可以錯過新馬季第一天呀！」馬主N與香港殘奧委員會大隊人馬到倫敦為香港健兒打氣，會長周一嶽因已脫離官場，無官一身輕，有時間留在倫敦激勵士氣，開幕後就掏腰包到唐人街買燒肉請大家吃一餐，攞番個意頭，希望鴻運當頭，爭取好成績。馬主N話今屆香港成績好好，攞到三金三銀六銅一共十二面獎牌，排名第三十四，勝過中華台北嘅第六十四名。第一名當然係中國啦，九十五金七十一銀六十六銅，根本冇得揮。香港有咁好成績，歸功於輪椅劍擊隊、女子乒乓隊與田徑隊，不過余翠怡、蘇樺偉、黃家汶等獎牌得主背後，榮譽背後，離不開艱苦訓練、堅毅精神以及金錢支持。不說不知，一張特製劍擊輪椅，價錢高昂，去外地比賽，除運動員外，還需專人照顧傷殘運動員以及各種設備（如輪椅），故此額外成本甚巨，可以講係無財不行。中國殘奧隊伍有國家支持所有經費及培訓費，唔憂冇錢。香港呢？除有特區政府正常體育撥款（即係話唔夠用咁解）外，好需要企業贊助，個人捐贈。大明星劉德華最有心，咁多年來一直大力支持蘇樺偉，故此蘇樺偉在男子二百米取得銀牌之後，就與劉德華擁抱、肉緊異常。各界朋友想支持香港傷殘人士體育發展，好易啫，可以直接搵周一嶽或馮馬淑嫻（Jenny Fung）或者打電話26028232搵林俊英（Martin Lam），佢地嘅辦公室就在新界沙田美林邨美楓樓B座141-148號地下。點解殘奧委辦公室設在公屋屋邨？好簡單啫，慳租金吖嘛，捐款得來不易，要節省經費！下星期一早上恒生銀行會向2012年倫敦奧運殘奧得獎運動員頒發獎金，總額一百八十萬元，對運動員好有鼓勵性。