【金鐘】
因為捲入已故華懋集團主席龔如心爭產官司,而搞到一身蟻嘅風水師陳振聰,最近投靠咗林以諾牧師,唔信風水改信耶穌。前晚Yomama乳酪店喺金鐘廊嘅分店開張,陳振聰同老婆譚妙清夜晚六點左右就去到捧場,佢哋一坐低已經有個女人上前招呼,但陳振聰同老婆並唔係食乳酪,而係分別飲咖啡同汽水。兩公婆跟住同成班朋友喺乳酪店吹水,傾到夜晚八點先至離開。
原以為陳振聰跟住同老婆去食晚飯,點知佢兩個同成班朋友行咗去隔籬嘅基督教播道會港福堂,亦即係鄭秀文返嗰間教會。
尋心靈清泉
原來港福堂前晚有個名為「心靈清泉」嘅周四音樂會,陳振聰專登帶埋老婆一齊出席,而身邊嗰班全部都係教友。佢哋逗留至夜晚九點離開,跟住陳振聰又同老婆以及兩位女教友折返乳酪店繼續吹水。
採訪、攝影:黃曉程、梁繼光