紐約人今夏放走咗林書豪，不過計球員實力，仍然屬於NBA前列，特別係佢哋嘅內線三塔安東尼、A史杜達米亞及真達拿，都有獨當一面嘅能力，加埋回歸嘅甘比，真係嚇死人；不過冇好教練，球員幾好波都冇用，紐約人就專登搵火箭名宿奧拉祖雲返嚟，特別指導一班內線球員，睇吓新一季呢班內線球員又學到幾多成？
綽號「The Dream」嘅奧拉祖雲，喺90年代成為NBA四大中鋒之一，同伊榮、大衛羅賓遜、奧尼爾齊名，連贏94、95兩屆NBA總冠軍㖭。奧拉祖雲嘅絕技就係「Dream Shake」，利用靈巧嘅步法耍到對手暈陀陀；02年退休後，奧拉祖雲就轉任教練，專門喺休季期間，幫新一代嘅NBA中鋒、大前鋒進行特訓，勒邦占士、懷特侯活等都上過佢堂。
A米自信心返晒嚟
今夏紐約人嘅大前鋒A米，就喺奧拉祖雲嘅侯斯頓老家，進行咗兩個半星期嘅練習營；練習完畢後，A米簡直就自信心返晒嚟，自言新一季個人數據可以比之前20分同9籃板更好。可能係A米大力推薦，紐約人就邀請「夢中人」飛到紐約，喺球隊嘅季前練習營中，再指點A米之餘，仲收埋安東尼、真達拿及回巢嘅甘比做入室弟子㖭。
對於新弟子，49歲嘅奧拉祖雲就品評一番，「夢中人」就指，安東尼內外線得分能力都好強，又有3分射程，同A米合作肯定冇問題。而對於同樣嘅美國奧運金牌成員嘅真達拿，同樣讚佢籃板同封阻能力出色，但就未留意佢嘅步法。雖然紐約人星光熠熠，但近年季後賽戰績都仲係好差，奧拉祖雲就以自己同德士拿做例子，勉勵紐約人眾星要為球隊犧牲，唔好只顧個人表現。
麥基迪將到紐約試腳
另外，紐約人今夏引入甘比、傑特等過氣老將外，33歲嘅前得分王麥基迪完成馬刺試訓後，就會轉到紐約；不過如果紐約人都唔留佢，麥基迪就話考慮到中國CBA發展。