熱血公民嘅「皇上」黃洋達喺facebook自爆一直唔支持人民力量，佢只係毓民教徒，幾乎令到人民力量爆發內戰。教主毓民前晚終於好霸氣咁落「聖旨」，叫人力支持者要向前看，唔好再喺佢個討論區同facebook講呢單嘢，否則佢就見一個block一個，大不了摺埋個討論區！但奇就奇在由蕭若元揸旗嘅人網討論區，仲係任人插皇上，搞到班教徒好混亂，唔知點做好！
教主毓民落兩道「聖旨」
話說一直喺皇上被指反骨事件冇出聲嘅毓民，前晚終於喺佢個網台節目《毓民踩場》表態，話佢唔會直接評論皇上事件，只要唔影響大局，佢唔會理呢啲拗嚟拗去嘅嘢，叫支持者要向前看、以大局為重，唔好再講。教主仲好霸氣咁落咗兩道「聖旨」：喺人網嘅黃毓民政評討論區，唔准再討論皇上事件，否則佢見一篇就刪一篇，大不了就摺埋個討論；第二道聖旨就係唔准喺佢黃毓民嘅fackbook入面留言討論皇上事件，否則亦係見一個block一個，話明「fackbook係我個社交網站，我鍾意cut邊個就cut邊個！」
教主出咗收聲令後，佢個政評討論區真係即刻和諧晒，全部鬧皇上嘅留言轉眼掃清，不過另一邊老蕭個主場，佢揸旗嘅《風也蕭蕭》討論區，仲有大量討論皇上事件嘅人力支持者留言，佢哋見蕭生同教主態度咁唔同，一時間感到好徬徨、冇晒方向。
有人撐教主嘅收聲令，但有人就唔認同，留言話「咁你同共產黨有乜分別？一聽到第二啲意見就封殺」，有人仲要求蕭生就事件開句聲，唔可以不了了之。八方睇嚟呢單嘢仲有排玩。