近年水貨客聚集和分貨的範圍已由港鐵上水站，蔓延至附近的屋邨及工廠大廈。巴士司機廖先生駕駛彩園邨巴士線超過20年，見證上水由寧靜新市鎮，淪為水貨客戰場的興衰史，「嗰時巴士站空地最犀利有成百幾、二百人喺度聚集，一啲喺度拆箱，一啲喺度分貨，居民落車都落唔到，真係好誇張」。
龍蝦入箱推走
他每駕駛一轉車，會有數分鐘短暫的休息時間，長年累月耳聞目睹，對水貨客的運作模式瞭如指掌，「佢哋每日2點至4點左右就喺度分貨，每日走三轉，每次150蚊，一日就賺450蚊。佢哋啲貨包羅萬有，除咗奶粉、日用品，仲有龍蝦、象拔蚌，包好一箱箱就推走」。最令他不滿是水貨客不時駕駛輕型貨車入彩園邨巴士總站的範圍，對行車安全帶來極大影響，不時有險象環生的情況。有巴士曾經與輕型貨車發生碰撞，「佢哋會有莊頭揸住van仔入嚟分貨，因為呢度除咗有地方外，又冇人管，加上有茶檔畀佢哋醫肚。但最離譜喺佢哋都唔理人，啲車橫衝直撞，試過好多次撞到我哋嘅巴士，真係好危險」。《蘋果》記者