雖然恒指未出現明顯突破，但唔少股份已經開始出現急升勢頭，噚日有和黃（013）同內房股，唔同板塊應該會陸續起動。正通汽車（1728）似乎喺低位形成一個大圓底，嚴格嚟講5.30元左右先係圓底嘅頸線，但估計只要成交配合，就可以開Turbo直搗黃龍，如果計番惠理基金打和價大約6至7蚊，應該有排玩。正通股價低殘，因為風險偏高，存貨多負債又多，不過，汽車代理股嘅存貨主要來自汽車，存貨有價值，走貨減債唔困難。風險高，但潛力亦吸引，今年上半年，售後服務毛利增長1.58倍至4.74億元人民幣（計及中汽南方貢獻），已經佔整體毛利四成，睇番近年賣咗咁多車，售後服務收入一般較滯後，呢Part喺可見將來只會大規模增長，即使賣車賺少咗錢，未來應該都係保持增長。正通短線較大疑慮係舊年新買嘅中汽南方，短期內發展潛力唔及得上正通原本嘅業務，因為中汽南方係賣寶馬以外嘅品牌，包括路華（LandRover）、積架（Jaguar）等等。正通嘅眼光未必有錯，因為內地人收入上升，對唔同品牌嘅認識遲早都會增加，所以正通藉住買入中汽南方，擴闊高檔產品組合，似乎係有遠見嘅一着，只係市場暫時未識貨，同時效益未有咁快反映出嚟。所以睇長遠嘅話，正通前景應該會比只賣寶馬嘅華晨（1114）更好。
前景會比華晨更好
惠理基金今年沽出唔少華晨股份，換馬買正通，由6個幾撈到3個幾，越低越撈，加上在之前高位儲埋唔少貨，晉佳粗略估計平均價要成6至7蚊，雖然暫時賬面輸咗唔少，但長遠應該係正確嘅一着，只等待時間去證明。如果信惠理基金，就可以家買，中線等到正通升去7蚊沽出，明顯跌穿4.3元止蝕。之前晉佳推介過天然氣設備股宏華（196），噚日受到簽威德福2億元定單嘅消息刺激，股價升5%。嚟緊面對西氣東輸三線全面開工，加上天然氣「十二五」規劃有機會今個月公佈，規劃將涉及天然氣儲氣庫建設，睇嚟可以帶動天然氣開發嘅需求，睇宏華現價只係市賬率1倍左右，嚟緊應該大把前途，買咗要揸實，目標價暫維持2蚊。晉佳本欄逢周一、三及五刊出