特首梁振英委任唐營嘅胡定旭，續任醫院管理局主席一年，令肥胡第二度打破政府委任公職人員唔超過六年嘅指引，做足九年。八方聽聞肥胡可以再續任，因為食衞局同衞生署都換咗人，政府希望穩定同和諧，唔想連醫管局都換新主席，所以安排原本已經夠鐘嘅肥胡留任多一年，穩定局面。肥胡04年由老董委任做醫管局主席，原本做六年喺時候走，10年貪曾再委任佢做多兩年直到今年11月底，當時已經俾人鬧用人唯親。噚日政府公佈肥胡破例再破例續任一年，直至出年11月底。八方聽聞食衞局局長高永文曾周圍搵人，但冇人肯做呢個吃力不討好嘅位；加上政府希望維穩，所以畀肥胡再坐一會。醫學會會長謝鴻興就話對CY好失望，CY喺競選時候承諾檢討醫管局管治，家好懷疑佢會唔履行承諾，下周三見CY時一定會反映不滿。不過公共醫療醫生協會前會長何栢良就話，醫生對肥胡唔太反感，佢為醫生都做咗唔少嘢，希望佢可以增加醫管局透明度，委任工會代表入董事局。