港交所（388）學紐約交易所每朝有敲鐘開市儀式，舊年推出開市儀式套餐，畀上市公司利用開市儀式搞慶祝活動，套餐盛惠3.8萬，港交所提供場地、酒水。喺家咁嘅經濟環境，上市公司想體面又有新意咁搞慶祝，呢個確實係唔錯嘅選擇。上個月冠軍科技（092）慶祝上市20周年，特登訂咗港交所個場搞慶祝，由主席簡文樂敲響銅鑼主持開市儀式，簡主席仲好有面子，請到港交所主席周松崗、證監會主席方正同埋一批駐港總領事出席。噚日輪到英皇鐘錶（887）為慶祝成立70周年搞開市儀式，大股東楊受成同仔女齊現身敲銅鑼。咁啱今年底有好幾間大藍籌要慶祝上市或者成立40周年，港交所不妨大力推銷，等個交易大堂熱鬧吓啦。港交所定咗規矩，一日只有一間公司主持開市儀式，若有新股上市，開市儀式要讓路，想搞開市儀式嘅上市公司就要快手申請。