狼班子有咁多新仔局長,唔單止林鄭做奶媽做到情緒波動,日日湊住呢批BB班局長嘅新聞秘書就更加係做到喊,做到走佬。八方聽聞,教育局局長吳克儉嘅新聞秘書Mary Li好快就會調返去總部幫手。據聞Mary被調嘅其中一個原因,係儉儉怪佢唔識挽救自己,叫新聞處換人。儉儉咪亂咁怪人啦,你政治技巧咁差,又面臨洗腦教育等地雷陣,好多人都「睇好」你會係下一位落台局長㗎!據聞社署首席新聞主任Roger張會臨危受命搶救儉儉。花名「Ger哥」嘅Roger曾經喺教育局做過七年,歷盡羅范至李國章做局長嘅大時代,乜嘢風浪都見過,就睇吓可唔可以急救儉儉啦。